Ditzum

Deur dat vervelende virus mo’k alderhaande dingen ofzeggen en uutstellen. Vandaor da’k vandemiddag naor Sneek toe west hebbe veur de verjaordag van Gerda. In wezen wa’k vuuf weken te laete, mar beter laete as nooit. We hebben gezellig bi’jpraot. Jelle en ik zullen van 12 t/m 16 juni een midweke naor et Duutse viskersdörpien Ditzum an de Eems. We hebben daor een husien in et centrum huurd. Zie de foto hieronder. Et huus het een Nedersaksische naeme: Tweede Tohuus. Dat is et die weke veur oons ok. Ik neme an dawwe daor gewoon Stellingwarfs praoten blieven kunnen. As et weer wat mitwarkt wiwwe ok een dag naor et Waddeneilaand Norderney en daor dan fietsen. As dat deurgaot zol et oons achtste Waddeneilaand wodden nao Texel, Vlielaand, Terschelling, Amelaand, Schiermonnikoge, Borkum en Wangeroge. Ik hope dat dat deurgaon kan, et liekt me prachtig.