Ditzum

Et is now vri’jdagaovend half achte en ik bin weer thuus nao vuuf mooie en waarme daegen mit Jelle in Ditzum. We hebben maendagmiddag inderdaod eten bi’j Van der Valk in Zuudbroek. Daor vlakbi’j is een Aldi, dat daor hewwe bosschoppen daon. En doe was et over Bad Ni’jeschaans niet iens zo veer meer naor Ditzum. Oonze verhuurster, Ulrike Nie, ston oons om kwat veur viere al op te waachten. Een aorige vrouw die Platduuts praotte en wi’j praotten Stellingwarfs weeromme. Et was een rejaol huus mit een tuun d’r aachter. Vanuut de tuun zaj’ de revierdiek van de Eems op mar hiel kotte ofstaand en we zaggen de masten van de schippen die in de haven laggen. Ditzum is een mooi dörp. Deensdag hewwe 45 kilemeter fietst in et Rheiderlaand. Zo hiet de streek daore. We kwammen deur alderhaande kleine dörpies: Hatzum, Critzum, Ditzumerverlaat, Dyksterhusen… We hebben tussen de middag wat eten op et terras van de bakkeri’je die in Jemgum an de supermark vaastezit. Ze hebben een lekker brotien veur oons toemaekt mit keze en schinke en dan nog een aander lekker brotien d’r bi’j en vanzels drinken. Et was de hiele weke slimme dustig. Ik vertelle morgen wel veerder, want ik bin now wel een betien verdoffeld. Hieronder een foto die ‘k maekt hebbe van de haven van Ditzum.