Diever

Vandemorgen he’k naor Wolvege west te bloedprikken, daornao he’k bosschoppen daon en ik bin ok nog bi’j aachternichte Femmie in Hooltpae an west. Van heur he’k een flut appels en peren mitkregen. Ik gao ien disser daegen dus stoofpeerties en appelsmotse wecken! Vandemiddag he’k verhaelen verteld veur de leden van KBO/PCOB van de gemiente Westerveld in de Kruuskarke van Diever. We bin de middag begonnen mit et zingen van et bekende lied Ga niet alleen door ’t leven. Die last is U te zwaar… Et was slimme aorig dat Jelly d’r ok was, dat is de moeder van Sijtze Veldema. En Sijtze is de omslagontwarper van mien boeken. Hi’j levert veurtreffelik wark en ik hope dat hi’j mien volgende boek ok doen wil. Et was prachtig haastweer, dat d’r zat nog zat volk op et terras van et resteraant naost de karke. D’r weren ok een protte fietsers onderwegens. Hieronder een foto die ‘k vandemiddag maekt hebbe van een mooi husien schieve tegenover de Kruuskarke. Dit husien het de naeme Keuterij. Et was indertied dus grif een klein boerespullegien.