Diana 75

Ik was gistermorgen om kwat veur 11 in Aalten bi’j Jan en Diana. D’r weren op zundagmorgen mar weinig vrachtwaegens op ‘e diek, dat et ree vlot. D’r wodde me drekt een lekker stok gebak veurzet, want Diana, een nichien van schoonzuster Roelien, is gister 75 wodden. Dat is een mooie leeftied om een fesien te vieren. Ik hebbe tussen de middag bi’j heur een brotien en een koppien heerlike tomatesoep had en doe biwwe middags naor Winterswiek reden. Ik bin mit Raymond en Leon mitreden. Et was nog ommeraek te zien dat Winterswiek en omgeving vleden weke woensdagaovend allemachtig zwaor en mal weer had hebben. Wi’j zatten doe in Lochem en bin de daans ontsprongen. Mat de baarms laggen daor nog vol takkeboel en overal laggen nog ontwottelde bomen. Daor moet nog hiel wat opredded wodden. Et fesien was in de Graansilo van Venemansmeule. D’r kwammen tussen de veertig en vuuftig meensken om et fesien mit te vieren. We begonnen daor vanzels ok mit gebak. Et was een gezellige middag en et was hiel mooi dawwe in twie groepen een rondleiding deur de meule kregen. Sund et jaor 1402 wodt d’r op dat plak maeld. Tot de dag van vandaege an toe. Wat een lange tied! Et aorige is dat in de meule een poes op himzels woond. Poes Billie. Ik zal daor een kollum over schrieven. Vanof half zesse was d’r een heerlik waarm en koold buffet. Ik hebbe ok nog wat vleis mitkregen dat overbleven was. Et is vanzels zunde dat et votgooid wodt. Om kwat veur achte bin ‘k daor gisteraovend weer in de auto stapt en ik hebbe onderweg allemachtig vule regen had. Hieronder een foto van Diana mit Jan, Raymond en Leon. Vandaege is nao de midweke en et fesien in de Aachterhoeke et gewone leven weer op gang kommen. Ik bin vandemiddag op ‘e fiets naor Wolvege west veur fysiosport.