Johan Veenstra
Stellingwarver schriever en verteller

Deventer

Plaetst op 26 april 2022.

Echt mooi fiets- en bootweer was et vandaege niet. Daor was et wat te fris veur. Dat we bin naor de mooie stad Deventer west. Daor wa ‘k in et verleden wel es een keer eerder west, mar dat is al zo lange leden da’k d’r niks meer van wus. Op ‘e hennereize biwwe over de Iesseldiek deur Wijhe en Olst gaon. Dat is mooi! In Olst was alles al prachtig versierd veur Keuningsdag. In Deventer hewwe eerst wat drinken en lekkers had op et terras van eetkefé De Sjampetter an de Brink. Een sjampetter is een Vlaams woord en et is een veldwaachter die aorig in de lorem is! Op ‘e Brink weren ze alles an et opbouwen veur… Keuningsdag! Wat het Deventer een prachtige oolde binnenstad. Wat een protte mooie gevels! We hebben een grote en lange stadskuier maekt. Ik hebbe onderwegens nog een boek kocht en we hebben de Grote of Lebuïnuskarke van binnen bekeken. We bin ok in de krypte west. Netuurlik hewwe et Bargkertier ok verkend. In de loop van de middag hewwe lekker eten op et terras van De Sjampetter. Ik hebbe een heerlike croque madame had. Op ‘e weerommereize biwwe over de snelweg via Apeldoorn gaon. Hieronder een foto die ‘k vandemiddag maekt hebbe van de Grote of Lebuïnuskarke. Wat een grote karke!