Johan Veenstra
Stellingwarver schriever en verteller

Deurtrappen (2)

Plaetst op 13 april 2022.

Ik hebbe vandaege mit een koppeltien meensken een fietstocht maekt in et kader van de eupening van et deurtrapseizoen. De gemiente West-Stellingwarf vreug me een schoffien leden a’k daor an mitdoen wol. Tegere mit buurtsportcoach Geerte Kwast he’k doe een mooie route uutzocht en die he’k vandaege dus fietst mit de meensken die heur daor veur opgeven hadden. D’r moch mar een beparkt tal meensken mit, dat we bin mit 19 man uut fietsen west. Alderhaande goeie kunde van me fietste mit! Dat was een slim plezierige en gezellige verrassing! We kwammen vandemorgen om kwat veur tiene bi’j mekaander in sporthal De Steense in Wolvege. Daor kregen we een bakkien drinken en wodden we verwelkomd deur twie wethoolders die elk een toespraokien hullen: Hanneke Zonderland (CDA) en Jack Jongebloed (VVD). Ze leuten weten dat de gemiente et slim belangriek vint dat oolderen fietsen en bewegen blieven, mar dan wel op een veilige meniere. Dat doe kregen we butendeure onderricht van een fietscoach en leerden we hoe we veilig opstappen, inienend stoppen en ofstappen mossen. Dat hewwe vervolgens ok oefend. En doe biwwe op pad gaon. Ik hebbe altied veurop fietst en buurtsportcoach Timo uut Stienwiek fietste aachteran. We bin vanuut De Steense naor de Lende fietst en doe over et fietspad bi’j de Lende langes naor de Driewegsluus. In et paviljoen kregen we een peer bakkies drinken en alderhaande lekkere happies! Nao disse stop biwwe over de Scheenesluus en de Ooldelaemster Brogge fietst en doe over Ooldetriene en Sunnege weer naor sporthal De Steense in Wolvege. Daor ston een heerlike lunch veur oons allemaole klaor: een peer soorten sop, bolle, bolties, alderhaande beleg en kroketten. Veurtreffelik! Wat een mooie dag! En wat was et heerlik fietsweer! Ik was om kwat veur twieje thuus en doe bin ‘k gauw mit de auto naor de gerage in Et Vene gaon. Dat was ofpraot omdat d’r spanningsverl√∂s wezen zol in de rechteraachterbaand. Mar d’r was niks te redden, dat daor wa’k rap weer klaor. Hieronder een foto die maekt is deur Lenus van der Broek. Hi’j ston oons vlak veur de Driewegsluus op te waachten en het oons al fietsende, mit mi’j veurop, op petret zet.