Johan Veenstra
Stellingwarver schriever en verteller

De Zweedse affaire

Plaetst op 28 september 2024.

Over de post kwam een uutneudiging veur de volgende coronaprik. Ik mag op 21 november naor De Rank in Wolvege. Dat is mooi vlakbi’j. De veurige keren mos ik naor Et Vene, Drachten en Appelsche. Vandaege bin ‘k beheurlik mu nao et gedoe van de laeste drie daegen. Omdat et zok ontiederig weer is he’k de Duutse laekens vandaege op bedde daon. Dat vuult now een stok lekkerder as et witketoenen goed.

Ik hebbe de roman De Zweedse affaire van Karen Swan lezen. Een mooi en spannend boek. Bell warkt as kiendermaegien bi’j et rieke echtpeer Hanna en Max Mogert. Ze het et geweldig naor de zin. Mar dan krigt ze een tillefoontien van een medische kliniek mit de vraoge as ze een bosschop deurgeven kan. Hanna heur man is wakker wodden. Bell snapt d’r niks van. Mar de man die wakker wodden is, is niet Max, mar Hanna heur eerste man die zeuven jaor in coma legen het. En die tiedinge zet et leven van heur allemaole op losse schroeven. Tiedens de midzoemer op ‘e Zweedse eilanen moet d’r keuzen wodden…