De Zwatte Haene

We bin d’r vandaege lekker een dag op uut west in de hitte… Eerst wawwe van doel en maek hier een lekkere fietstocht, mar dat leek oons toch niet zo goed toe bi’j 38 graoden. Doe wawwe van plan en maek toch een boottocht. En dan et wiede waeter op naor et Burgumermeer zodawwe misschien wat wiend hebben zollen. Mar vandemorgen leek dat ok niet zoe’n goed idee. D’r was zowat gien wiend en wat een hitte! Stel dawwe pech kriegen zollen en we dobberden in de volle zunne op et Burgumermeer omme. Ik zol et lotien wel legd hebben kund. En dat zol vanzels de definitieve slag veur de Stellingwarver schrieveri’je west hebben. Dat is een lekkere, prikkelende uutspraoke. D’r bin grif meensken die et hier hielemaole niet mit iens binnen! We besleuten vandemorgen nao tillefonisch overleg om een lekker rittien in de auto mit airco te maeken. Dat we bin naor et kooldste plakkien van Nederlaand reden. Over de Bildtdieken naor De Zwatte Haene. Mar ja, daor was et doe al wel 33 graoden. Op et terras van et resteraant hewwe wat drinken had mit een lekkere hiempe cranberry-appelgebak. En doe hewwe een aentien over de diek kuierd. Daor was wel een betien wiend. Heerlik! Om de tien meter een slok waeter en dan was zoks wel te doen. We bin vervolgens naor Burdaard reden. Daor hewwe vandemiddag om twie ure op et terras van It Posthûs bi’j de brogge wat eten had. Ik hebbe een brotien rookte zalm had. Doe ‘k in de loop van de dag weer op huus an gong en deur Liwwadden ree was et daor 37,5 graoden. Bi’j Akkrum en Et Vene was et onderwegens 38,5 graoden. Doe ‘k thuuskwam was et daor 36,5 graoden. Vergeleken mit Akkrum zuver wat frissies! In huus was et 24 graoden. Hieronder een foto van een mooie mar snikhiete dag. Gezicht over et Wad in de richting van Terschelling vanof de diek bi’j De Zwatte Haene.