De Zwatte Haene

We bin vandaege op stap west naor Et Bildt. Bi’j resteraant De Zwatte Haene biwwe de diek opgaon veur een kuier. We weren daor vleden jaor op ‘e hietste dag van et jaor veur et laeste west. Op die dag was et in Ni’jhooltpae 37 graoden en op ‘e zeediek 33 graoden. Om de stokmennig stappen moj’ doe een slok waeter nemen, mar dat hoefde now niet. Et was now krap 30 graoden koolder as doe. We bin eerst een tippe et oost inlopen en doe weeromme. In et resteraant hewwe doe wat drinken en waarm eten had. Nao et eten biww nog een aentien et west inlopen en doe weeromme. Et was fantastisch mooi zunneschienweer en d’r ston haost gien wiend. Nao De Zwatte Haene hewwe nog een autorittien deur Et Bildt maekt. Oolde- en Ni’je Ziel, Oolde Leye… Deur dat laeste dörp hewwe wel es mit de boot veerd. Een mooi laand. Mar as een foele haastwiend over de kaele vlakten jacht of as daor de dieze daegenlaank boven die kaele vlakten hangt… Et is d’r prachtig, mar ik zol d’r niet wonen kunnen. Ik moet bomen om me henne hebben. Hieronder een foto die ‘k bi’j De Zwatte Haene maekt hebbe. Uutzicht over et mooie Wad.