De zomer van 1823

Vandemiddag het Jarina hier op ‘e thee west. Ze het een peer liende boeken weerommebrocht en het ni’jen weer mitkregen. Ze nam snupies veur poes Marja mit, dat poes vint heur now ok slimme aorig! Ik mag bi’j heur de auto op ‘e oprit zetten as de boel hier ofsleuten wodt. De Stellingenweg wodt in die tied ok ofsleuten van Wolvege naor Berkoop, he’k heurd.

Ik hebbe et boek De zomer van 1823 – Lopen met Van Lennep lezen. Et boek wodde bezorgd deur Geert Mak en Marita Mathijsen. Die laeste maekte medern Nederlaans van et dagboek dat schreven wodde deur Jacob van Lennep (1802-1868). Tegere mit zien studiekammeraod Dirk, graaf van Hogendorp (1797-1845) maekte hi’j in de zoemer van 1823 een kuiertocht deur Nederlaand. Zeunen uut veurnaeme femilies maekten in die tied een Grand Tour. Een reize deur Europa, veural Duutslaand en Italïe, veur de kultuur daore en om et leven kennen te leren. Om volwassen te wodden. En grif ok wel om mit mooie vrouwluden wat omme te slingeren. Van Lennep en Van Hogendorp maekten liekewel een kuiertocht deur et eigen laand en hullen beide een dagboek bi’j. Dat dagboek van Van Lennep is prachtig om te lezen. Hi’j schrift percies waor as ze langeskommen, bi’j welke meensken as ze an gaon, waor en hoe ze slaopen, hoe et weer is, wat ze allemaole wel niet eten en drinken. Ontzaggelik vule koffie, thee, wien en nog starker spul. Soms reizen ze even mit een postkoetse. Mar meerst lopen ze uren en uren deur grote heidevelden, bossen, over gatterige zaandwegen. Zo kommen ze ok deur Wolvege… Daor wodt wel positief over schreven. Mar as et niks is, schrift Van Lennep dat ok. En as ze mooie vrouwluden zien wo’n we dat as lezer ok geweer. As ze lillikerds zien ok. Wat een aandere wereld… Nederlaand hadde doe 2 miljoen inwoners, Liwwadden 19.000. Et is echt kostelik om te lezen. Et is zo beeldend daj’ et zels mitmaeken. Ie lopen krek zolange totdaj’ driefdeurnat regenen en blaoren onder de voeten kriegen en ie hobbelen mit in koetsen over vreselik slechte wegen. Een prachtig verslag van de zoemer van 1823.