De Zoemer van Jeanne

Ik bin vandaege de hiele dag op ‘e vlieg west. Vandemorgen wa’k al betied in et Centrum veur Prentkeunst op ‘e Fochtel veur de eerste halfjaorlikse vergeerdering van de Stichting Nobilis van dit jaor. Ik hebbe vandemorgen ofscheid neumen as bestuurslid van de Stichting. Mien opvolger is Barteld Londo die al slim in et zoolt bebeten is. Ik kreeg prachtige bloemen en een boekebon! Nao de vergeerdering hewwe mit mekaander eten in et Centrum: sop en bolties. En doe kwam d’r een flut volk veur et begin van De Zoemer van Jeanne. De grote zael van dörpshuus Et Legien dat an et Centrum veur Prentkeunst vaastezit zat stampvol volk. Op zes plakken in Nederlaand wodt van ’t jaor andacht geven an leven en wark van Jeanne Bieruma Oosting (1898-1994): Zutphen, Maassluus, Et Vene/Oranjewoold, Almen, De Fochtel en Beetsterzwaog. En dat allemaole as gevolg van de prachtige biografie over Jeanne die schreven wodde deur Jolande Withuis die ok de biografe van Juliana is. Nobilis gaf vandaege ok een schitterend boek over Jeanne uut: Jeanne Bieruma Oosting en de prentkunst. Et boek is schreven deur Peter Kooij en Pieter Jonker. Een boek mit een protte illestraosies, had kaft, leeslint en 240 bladzieden. Et eerste exemplaor was veur Jolande Withuis die vanuut Zutphen overkommen was. Daornao eupende zi’j de tentoonstelling mit dezelde titel: Jeanne Bieruma Oosting en de prentkunst. Gao naor De Fochtel om al dat moois te bekieken! Kiek ok op www.dezomervanjeanne.nl

Gisteraovend hewwe in de Nicolaaskarke van Ni’jhooltpae geneuten van et konsert van et Nijkoor onder leiding van Klaas Peter van der Laan. Minke Postma zong heur Stellingwarfstaelige lietien Op ‘e vlocht. Een toepasselike titel in disse gruwelike tied. In de karke hongen een peer regenbogevlaggen mit et woord Peace d’r op. In de preekstoel ston de mooie zeefdrok van Peter Gerrits in de Oekraïnse kleuren. Zie hieronder. Bi’j et hekke naor de karke toe stonnen blauw en geel bluuiende vioelties. Et konsert duurde van acht tot negen ure. Doe biwwe verhuusd naor mfc De Ni’je Stienze an de overkaant van de weg. Daor was et slimme gezellig en he’k mit alderhaande meensken praot. Ok mit Barteld Londo, mien opvolger bi’j Nobilis. Dat ik bin eerst nao elf ure weer naor huus gaon.