De zoemer is haost veurbi’j

We bin de hiele dag mit de boot et waeter op west. Van kwat over tiene vandemorgen tot vanaovend half zesse. Et was heerlik weer mit een oplopende temperetuur naor 23 graoden. We hebben omtrent dezelde route veerd as vleden weke en ik hebbe veur een pat ok weer stuurd. Krek as vleden weke hewwe weer eten op et terras van hotel-resteraant Ie-Sicht. Ik hebbe daor om half drieje een heerlik twaelfuurtien had. Een weke leden mossen we een ure waachten op et eten, vandaege mar tien menuten. D’r zat now lange niet zovule volk, mar et was nog wel drok mit boten op et waeter. Ok al bin de vekaansies veurbi’j. As et weer ommeslat kan dit zomar de laeste boottocht van dit jaor west hebben. Ik wor daor altied wat mankeliek van. Disse zoemer is ok al weer haost veurbi’j en hoevule mooie zoemers zitten d’r nog veur mi’j in ’t vat? Mar… ik hope op nog een boottocht! Hieronder een foto die ‘k vandemiddag maekt hebbe. Disse boot kwammen we aachterop. Rechtsveur leit De Veenhoop. Hotel-resteraant Ie-Sicht is hier vlakbi’j. Et ligt een peer honderd meter veerder an de linkerkaant van et waeter.