De Waddenzee op

Fettje en ik hebben vandaege een schitterende dag had. We bin vandemorgen naor Ton en Marian de Groot van De Groot Recreatie in Hippolytushoef reden. We kenden Ton en Marian al wel. Ik hebbe al es bi’j heur optreden op een verjaordag van Marian, Fettje en ik hebben d’r al es fietsen huurd, en laestdaegs kwammen ze langes op Eupen Stal. We hebben eerst genoeglik bi’jpraot en hebben d’r een brotien en wat drinken had. Vervolgens biwwe naor et grote havengebied van Den Oever gaon. Daor lag heur boot daor ze mit toeristen en aander volk de Waddenzee op gaon. Zeune Koen was de stuurman die uutleg gaf. Et was een fantastisch mooie tocht over de Waddenzee. We zaggen wiethoevule zeehonnen op een zaandbaank liggen en we hebben garnalen viskt. Die bin kookt en daornao konnen we ze pellen en opeten. Ik lusse dat goed wel. De veertocht duurde wel goed twienenhalf ure. In Den Oever hewwe ofscheid neumen van Ton en Marian en we hebben heur bedaankt veur een hiele mooie dag. Onderwegens naor huus hewwe in Wolvege op et terras van wegresteraant De Stoof om zes ure een twaelfuurtien had. Ie kun daor nao vuuf ure nog gewoon van de lunchkaorte bestellen, dat vien ik daor zo makkelik. En doe was die mooie dag al weer veurbi’j. Hieronder drie foto’s. Boven: een klein pat van et havengebied van Den Oever. Midden: zeilschippen op ‘e Waddenzee. Onder: Marian het Fettje en mi’j op ‘e boot op petret zet.