De Wachter in Zuudlaoren

Nao een renevaosie hereupende Preenses Beatrix op 11 april de zaod- en euliemeule De Wachter in Zuudlaoren. Die is van ’t jaor 175 jaor oold. Wi’j bin daor vandaege henne west om die mooie meule te bekieken. Prachtig! We hebben d’r eerst wat drinken had en een vulde koeke die deur de bakker van de meule bakt was. Heerlik! We bin tot haost bovenin de meule klommen en kregen uutleg van de vri’jwillige mulders. Iene was nog een jonge vent die ok lerer Duuts was. Ze legden oons van alles uut en we hadden van daor een prachtig uutzicht over de streek. D’r was ok alderhaande oold ark te zien. Een man leut kiender en oons zien hoe ze vroeger koffie maelden in een koffiemeule. Now ja, dat wussen wi’j nog wel. We zaggen ok hoe speceri’jen verwarkt/maeld wodden in de meule. Keneel, neutmuskaot, kruudnaegel… Ik hadde zoks nog nooit zien. En we zaggen hoe lieneulie maekt wodde van vlas. In een appatte hal was een hooltzaegeri’je in bedrief en de smid porkte et vuur op. Et was krek as wa’k as joongien weer in de smederi’je van Hendrik Donker. D’r hadde aenlik een boer ankommen moeten mit een peerd dat besleugen wodden mos! We hebben d’r mit mekeer drie uren te zuke brocht. Onderweg naor huus toe hewwe waarm eten had in resteraant Boszicht in Ni’jberkoop. Heerlike zalm. Hieronder een foto die ‘k maekt hebbe van De Wachter.