De vrouwen van Soestdijk

Gister wa’k op ‘e vlieg en vandaege al weer. Vandemorgen om half tiene ston Jan Berend mit de auto op ‘e oprit en bi’j him bin ‘k in de auto stapt. We bin eerst naor Baarn reden, daor hewwe in resteraant De Generaal een bakkien drinken en een beste hiempe waarm appelgebak had. En vervolgens biwwe naor Peleis Soestdiek gaon veur de tentoonstelling De vrouwen van Soestdijk. Van Catharina Hooft, de vrouw van de burgemeester van Amsterdam tot keuninginne Juliana. Van alle vrouwluden die daor woond hebben en daor van belang west hebben hong d’r een mooi petret mit een verhael d’r bi’j. Van verschillende Nederlaanse ontwarpers weren d’r vazen, jurken, serviezen en interieurobjekten te zien. We mossen daor hoesies om de schoenen doen. Zoks he’k ien keer eerder mitmaekt. Doe wa’k mit Haarm in de zeuventiger jaoren in et peleis in Arolsen, daor keuninginne Emma wegkwam. Daor mos dat ok. Et was d’r vandaege hiel drok. De tentoonstelling gaot de laeste weke in en d’r bin al tussen de dattig- en veertigduzend meensken west te kieken. Et is veur mien generaosie vanzels ok nostalgie. Dit blift veur oons et peleis van et jaorlikse defilé en de keuninklike femilie op et bordes. We konnen ok verschillende vertrekken boven bekieken en konnen ok in de kelders. We weren d’r een jaormennig leden ok west, doe vul al op hoe simpel de femilie daor leefde. D’r bin een stokmennig mooie zaelen beneden in et peleis, mar waor ze woonden was et hiel ienvooldig. Now dee blieken dat et een oftaans spullegien an et wodden is. An de buterkaant oogt et nog wel mooi, mar wat is dit ikonische gebouw neudig an een grote resteraosie toe. Mar ja, zoks kost zeker honderd miljoen daenk ik zo en het de ni’je eigener dat in et vessebusien? As et zo gaot, komt et niet goed. Aj’ nooit argens wat an doen, gaot et hadde van je of. Mar et was mooi om d’r nog es kieken te kunnen! We bin nao de tentoonstelling naor Lege Vuursche gaon. Daor hewwe wat drinken en twie plakkies bolle mit twie kroketten had in resteraant Het Vuursche Bos. Alle resteraants en pankoekehuzen zatten vol volk. Nao de kroketten biwwe weer op huus an gaon nao een blinders mooie dag! Hieronder een foto die ‘k vandemiddag maekt hebbe van et oons zo bekende witte peleis.