De vrouwen van Hendrik de Jong

Wat is et vandaege now toch vroeg donker. Harrekrastes nog an toe, ik vien daor niks an. En dan hewwe ok nog van dat aekelike haastweer. Ik hebbe vandaege de beide vertaelde filmlieties nog es goed bekeken en ze doe naor Steven de Jong maild. Hi’j moet mar zien as hi’j d’r wat mit kan. Ik hebbe ok een hieleboel verhaelen rippeteerd veur et 3.300-ste optreden van morgenaovend. En now mar hopen dat alles d’r goed inzit en ik d’r dan niet in ommetieze en mien stemme ok niet kwietraeke.

Ik hebbe de spannende historische roman De vrouwen van Hendrik de Jong lezen. Et boek is schreven deur Steffie van den Oord. De grondslag is waor gebeurd. In 1893 verdaenkt Scotland Yard de Nederlaander Hendrik de Jong d’r van dat hi’j lichtkaans Jack the Ripper is daor nog altied naor zocht wodt. Dat is niet zo, mar oonze Hendrik is lange niet schone op ‘e lever. Hi’j legt et an mit verschillende vrouwluden, wet ze haandig geld of te troggelen, en maekt d’r ok een peer van kaant. Hoe lokt et him om vrouwluden in Amsterdam, Gent, Londen en Boston zo in te palmen? Et aorige is dat et verhael ok deur al die vrouwluden verteld wodt. Zo koj’ as lezer hiel dichtebi’j. Ik hebbe et boek mit genoegen lezen.