De vrouw die Friesland redde

Ik hebbe Sunny Jansen heur boek De vrouw die Friesland redde lezen. Een biografie over Albertine Agnes (1634-1696). Een mooi boek da’k in een peer daegen uutlezen hebbe. Albertine Agnes was een dochter van stadhoolder Frederik Hendrik en Amalia van Solms. Ze trouwde mit de Friese stadhoolder Willem Frederik van Nassau-Dietz. In et begin interesseerde Frieslaand heur niks. In Den Haag was meer te beleven as in Liwwadden en de Haagse peleizen weren veurnaemer as et Stadhoolderlik Hof in de Friese heufdstad. Butendat was zi’j as preenses van Oranje aorig hoger in rang as heur man die mar een graaf was. Mar nao de verschrikkelike dood van heur man veraanderde Albertine Agnes hielemaole. Willem Frederik was op een keer zien pistool an et schonemaeken, hadde niet in de gaten dat d’r nog een koegel in zat, en scheut himzels in et gezicht. Hi’j leefde nog een peer daegen en schreef van alles op pepierties wat d’r gebeuren mos. Nao zien dood bleek Albertine Agnes een slim kerdaote vrouw te wezen. Ze zette heur hielemaole in veur Frieslaand en wodde regentesse veur heur zeune Hendrik Casimir II. Ze argerde heur an et poletieke geharrewar in Frieslaand. Frieslaand wodde bestuurd deur volk dat onder mekeer almar spul maekte en niet deurpakte mit de noodzaekelike dingen. Dat dee Albertine Agnes wel. Deur et inzetten van de Friese Waeterlinie in et Rampjaor 1672 wus zi’j et noorden te bescharmen tegen de wriede bisschop van Münster en zien soldaoten.

Hieronder een prachtige haastfoto die Douwe me vandaege toestuurde. Hi’j en Romkje zatten een peer daegen in Markelo. Sallaand, Twente en de Aachterhoek… Ik vien dat de mooiste streek van oons laand en komme d’r graeg.