De Vogezen en Exloo

Vandemiddag he’k een fietstochien van 21 kilemeter maekt. Ik bin bi’j de Lende langes naor Wolvege west en mit twie fietstassen vol bosschoppen weer op huus an gaon. As et even kan gao ‘k zoemers niet mit de auto om bosschoppen. Dan mar een keer extra fietsen. Dat liekt me vule gezonder toe. Wat begint de brem trouwens mooi te bluuien hier in et dorp bi’j de Karkelaene langes. Prachtig!

Ik kreeg een peer foto’s toe-appt van Douwe. Die is tegere mit Romkje op vekaansie. Ze zitten in een husien in de Vogezen. Zie de foto hieronder. Zo zicht et d’r daor uut. Thuus in Veenwoolden hebben ze vaeke drie buurtkatten op vesite. En dat is in de Vogezen percies zo. Ze hebben daor ok een buurtkatte bi’j heur in et zoemerhusien. Dat is mooi.

Jelle en ik gaon vandezoemer een midweke naor Exloo in Drenthe. Daor zicht et d’r hiel aanders uut. De laeste twie jaor zatten we in een husien in Lochem. Hoe oolder awwe wodden des te dichter we bi’j huus blieven. Et zal ankem jaor, awwe d’r dan nog binnen, wel Appelsche of De Lemmer wodden. We moe’n zien dawwe in Exloo twie buurtpoezen bi’j oons in et husien kriegen. Dan kuwwe daor aovens elk iene op ‘e schoot hebben awwe naor de tillevisie kieken of een boek zitten te lezen. Zoks is gezellig en huselik.