Johan Veenstra
Stellingwarver schriever en verteller

De vierde meie

Plaetst op 4 meie 2022.

De vlagge hangt halfstok en ik lope vanaovend weer mit in de stille tocht in de Ni’je Anleg in Wolvege. Dat kan gelokkig ok weer nao de coronatied. Ik vule et gewoon as mien plicht om mit te lopen. Dat is een diep gevuul. Vroeger gong ik elk jaor mit mien moeder. Nao heur wegraeken allienig. De laeste jaoren veur corona ok wel es mit Fokje en Geertje. En now weer allienig, mar… toegeliekertied mit een protte aanderen. Ik zal et veurjaor zien en heuren: de bluuiende kestanjes, et geluud van de voegels. Allegeer ni’j leven… Ik zal mit al die aandere meensken twie menuten stille wezen. Ik zal luusteren naor et Wilhelmus en et God save the Queen. Ik zal zien hoe de burgemeester een kraanze legt en aanderen bloemen. Ik zal op ‘e stienen de Engelse naemen lezen van de mannen die niet oold wodden binnen. Ik zal an de oorlog daenken die now zo vlakbi’j is en an dat mooie lietien van Claudia de Breij.

Als de oorlog komt,
En als ik dan moet schuilen,
Mag ik dan bij jou?

As et d’r echt op ankomt, bi’j wie kan ik dan terechte? Wie dot de deure veur me los, wie lat him dichte?