De vierde meie

Dit is wel een hiel laet dagboekstokkien. Et is now tien ure en ik bin krek thuus vanuut Wolvege. Al meer as dattig jaor doe ‘k op ‘e vierde meie mit an de stille tocht en de plechtighied in De Ni’je Anleg. D’r weren vanaovend een protte meensken, jong en oold. Toespraoken, gedichten van kiender, et leggen van kraanzen en et Wilhelmus en et God save the King. Dat bin veur mi’j toch altied weer kiepevel-mementen. De twie menuten stilte en de roeken die overal deurhenne krassen. Dat is mooi.Wi’j herdaenken de meensken die heur leven geven hebben veur oonze vri’jhied. Zi’j bouwen nusten en kriegen jongen. Ni’j leven in et frisse gruun van de meitied. D’r weren van ’t jaor veur et eerst militairen van laand- en lochtmacht, marine en Keuninklike Massiesee bi’j. Nao de plechtighied bin ‘k mit Wiebe Nanninga mit naor huus gaon en he’k van zien vrouw Gea een peer bakkies drinken had. En ja, dan wodt et laete.

We bin d’r vandaege overdag op uut west. Et was prachtig fietsweer. We hebben de fietsen vandemorgen aachter op ‘e auto zet en bin naor Appelsche reden. We hebben de auto bi’j et Butencentrum Drents-Friese Wold van Staotsbosbeheer zet en hebben doe een tocht van 47 kilemeter maekt. Eerst meerst deur de bossen naor Vledder, van daor over Wapse naor Diever. Wat was et overal drok mit fietsers. In Diever hewwe op et terras van resteraant Keernpunt wat drinken had mit een slim lekker stokkien gebak d’r bi’j. En doe biwwe deur de bossen weer op Appelsche an gaon. Wat een prachtige tocht! De brem begint te bluuien en nog even en dan bluuien de kestanjes ok. We hebben et d’r onderweg nog over had wawwe doen moeten zollen as d’r veur oons op et fietspad twie wolven staon zollen… Gewoon deurfietsen! Doe we thuuskwammen he’k gauw de vlagge halfstok hongen en doe bin we naor resteraant De Rustende Jaeger in Hooltpae gaon veur een heerlik bod waarm eten. En nao et eten bin ik naor de herdaenking in Wolvege gaon. Et kon allemaole krek. Hieronder een foto die ‘k vandaege maekt hebbe. Dit is et Butencentrum Drents-Friese Wold, et begin en et aende van oonze fietstocht. Et was in alle opzichten een mooie dag!