De verhaelekoffer

Doe ‘k vleden weke mit aanderen vertellen moch in museum ’t Kiekhuus in Wolvege, he’k et boek De verhaelekoffer kocht. Die verhaelebundel wodde in 2023 deur ’t Kiekhuus uutgeven en d’r staon verhaelen in van verschillende Stellingwarver schrievers: Jaap Sikkema, Roelof Bakker, Henk Breukelaar, Jimmy Visser, Koosje Hornstra en Grietje Bosma-Dijkstra. Ik hebbe et boek mit genoegen lezen en et zicht d’r ok mooi uut. Ik vien et zo mooi dat d’r een verhael van Koosje in staot. Ze schrift over et rieden van de Sterrit en over heur gemattel op et Wiede van de Lende. Zo is et mi’j indertied ok vergaon en doe he’k de redens sebiet votdaon. Dat nooit weer. Et is an et aende van disse maond al weer een jaor leden dat Koosje zo onverwaachs wegraekte. Et is gewoon niet te bevatten dat d’r haost al weer een jaor veurbi’j is. Et is in oktober trouwens al weer drie jaor leden dat Jimmy uut de tied raekte. De tied liekt almar vlogger te gaon.