De toan fan…

Ik hebbe gister een mooie aovend had bi’j de vri’jwilligers van de Griffioenbussen in Wolvege. Ik ston bi’j de tap te vertellen. Et was hiel gemoedelik en genoeglik. Morgenmiddag za’k naor Else te vertellen.

Et pergramme De toan fan… op Omroep Frieslaand-radio is zomar ophullen te bestaon en zodoende hebben alle kollumnisten daon kregen. Dat is meer as zunde. Now is o.a. et Snekers van Henk van der Veer, et Bildts van Jan de Groot en… et Stellingwarfs van Jan Koops niet meer te heuren. Et is een verschraoling dat disse mooie taelen now niet meer te beluusteren binnen op ‘e radio. En zo brokkelt alles of. Dat idee he’k zo staorigan mit een protte dingen. Et slimste is dat demekraosie en vri’jheden onder drok staon. De kommende weke wodt een belangrieke en ok griezelige weke mit de verkiezings in Amerike. Trump en Musk bin in mien ogen ok veur oons levensgeveerlik.

Et was vandaege prachtig fietsweer, dat ik bin op ‘e fiets naor Wolvege west om bosschoppen te doen. Mit de fietstassen vol bin ‘k weer thuuskommen. Op disse meniere kan ‘k vanzels lange niet zovule mitnemen as in de auto. Mar ik bin eins van doel om ok vandewinter, as ’t een betien zunnig weer is, meer op ‘e fiets te doen en de auto vaeker staon te laoten. Onderwegens naor huus toe he’k vandemiddag aachter Hooltpae, bi’j de Scheene, onderstaonde foto maekt.