De tasse inpakken

Vandaege he’k een fietstocht van 43 kilemeter maekt. Et was nog altied heerlik fietsweer mit een oplopende temperetuur naor 26 graoden. Ik bin bi’j de Lende langes naor de Driewegsluus fietst en doe over de Scheenesluus. Overal bluuien op et ogenblik de kattestatten. Wat een mooi gezicht: et paors van de kattestatten tussen et geel van de wederik. En dan de velden mit bluuiende eerpels. Prachtig! Ik hebbe even schoft hullen bi’j et bedoeninkien an de Van Helomavaort. Daor he’k wat drinken en een boltien mit een frikandelle had. Ik trof Kaste en Minke daor. Lange leden zat ik mit Kaste in de eerste klasse van de legere schoele. Ok al woonde hi’j op Der Izzerd, hi’j gong in Ni’jhooltpae op schoele. Binnenkot wodt hi’j 80 jaor… Deur Ooldetriene, Sunnege, Wolvege en Hooltpae (bi’j de Scheene langes) bin ‘k weer op huus an  gaon. Hieronder een foto die ‘k maekt hebbe van de karke van Ooldetriene die al lange jaoren as dörpshuus dienst dot.

Ik zal vanaovend de tasse inpakken. Morgen gaon Jelle en ik een midweke vekaansie holen. We gaon naor etzelde husien as vleden jaor. Et ligt onder de bomen, dat schilt, want et zal vreselik hiete wodden. Vleden jaor regende et algedurig en konnen we mar iene dag fietsen. De achtkesteletocht van Vorden. Misschien kuwwe now niet fietsen vanwege de hitte. Et zal omtrent 35 graoden wodden… We zullen et zien. Et is trouwens de 35ste keer dawwe tegere op stap gaon. Eerst was et altied mar twie daegen, laeter een midweke. De eerste keer was op 24 en 25 november 1989. Doe biwwe naor Amsterdam west. Mit waore doodsverachting het Jelle doe alle verkeersregels overtreden in de buurt van et Leidseplein en veur een pelisieburo langessteuven op weg naor et hotel. In 1990 en 1991 biwwe niet vot west. Ik was doe eins altied ziek en mos oppereerd wodden. Vanof 1992 bin we ieder jaor vot west. Lao’we hopen dat et zo nog wat deurgaon kan.