De Sukerei

We wollen vandaege aenlik eerst uut fietsen, mar et was mistig en et leek niet zo mooi te wodden. We bin dus niet gaon, mar aachterof bekeken hadde et wel kund. Now ja… We hebben liekewel een prachtige dag had. We bin naor et eupenlochtmuseum De Sukerei in Damwoolde west. We weren daor een ure te vroeg, dat we hebben eerst wat drinken en een hiempe gebak had in et grote winkelcentrum van dat dorp. In De Sukerei staot een cichoreidreugeri’je van vroeger. Cichorei wodde ok wel bruukt as koffie. De plaante bluuit mit blauwe bloemen en de bieten wo’n rooid, fienhakseld en dreugd. Et wodt in alderhaande produkten verwarkt. We hebben eerst een film bekeken over et verbouwen van cichorei. Dat dreugen was geveerlik wark. Dat moch allienig daon wodden deur manluden die een vrouw en al kiender hadden. Aanders koj’ laeter gien kiender meer kriegen. Mal wark dus. Mit een gids die overal prachtig van vertelde hewwe et terrein over west en drie oolde husies bekeken mit beddesteden en zo. Een feest van herkenning. Ik hebbe daor vroeger nog in slaopen. En d’r staot ok een mooie waetermeule. Laeter hewwe daor nog wat drinken had en ik hebbe cichoreikoekies mit naor huus neumen. We hebben vanaovend waarm eten had in et resteraant bi’j de Koepelbos in Berkoop. Daor zat direkteur Arjan van de Schrieversronte ok. Hieronder nog twie foto’s die ‘k vandemiddag maekt hebbe in et mooie eupenlochtmuseum in Damwoolde. Gao d’r es henne! Et is echt hiel mooi! En dan steun ie zoe’n klein museum!