De storm

Ik was nooit zo weg van Nederlaanse films, mar now he’k de laeste tied toch twie hiele mooien zien. Twie films die in Zeelaand speulden. Een schoffien leden De slag om de Schelde en gisteraovend op België De storm. Dat was toch een verhipte mooie film mit prachtig spel van Sylvia Hoeks en Barry Atsma. En wat een verrassend slot! Et gong vanzels over de waetersnoodramp van feberwaori 1953. Ik wete dat nog goed. Ankem jaor is dat al zeuventig jaor leden. Ik was doe een joongien van zeuven jaor en wete nog dat de vlagge halfstok hong vanuut et zoolderraem van de schoele. Dat betekende dat d’r wat slims gebeurd was. Dat beeld van die vlagge zie ‘k zo nog veur me.

Ik bin gien sportman en kieke eins nooit naor sport op ‘e tillevisie. Mar ik kieke altied wel as d’r Olympische Speulen binnen. Dat ik zat d’r gistermorgen klaor veur en zag Irene Schouten goold winnen en Suzanne Schulting d’r henneknoffelen. En vandemorgen zat ik d’r weer klaor veur. We zollen vanzels weer goold winnen! Mar we wodden overtroefd deur een Zweed mit een Nederlaanse naeme. Dat was verdikkeme oonze bedoeling toch niet! En veerder missen zokke wedstrieden geweldig vule sfeer zonder pebliek. Dat is toch zo verhipte jammer.

De kommende zaoterdag zit ik mit mien boeken op ‘e hobbymark in dörpshuus De Buorskip in Beetsterzwaog. Et is van morgens tiene tot middags vufe. D’r is ruumte zat in dat gebouw, dat de aanderhalvemetersaemenleving hoeft niet in geveer te kommen. Wat een lang woord is dat: aanderhalvemetersaemenleving! Ik hope trouwens vurig dat die gauw tot et verleden heuren zal. Mar… kom zaoterdag mar naor Beetsterzwaog. Ik hebbe mooie kopies veur slieterspriesies!