De stille vogel

Gister zag ik iederkeer een markloper bi’j me in de toverhaezelneutepolle. Hi’j ropte an de takken en takkies omme, brak d’r iene of, en nam dat dan mit in de bek. Et is overdudelik meitied. De markloper moet een nust bouwen, d’r moe’n eier legd wodden die bebruded wodden moeten, en dan kommen d’r kleine markloperties. Dat is hiel goed, want d’r moe’n altied kleine markloperties kommen blieven.

Now we et toch over voegels hebben… Ik hebbe de spannende Skandinavische  thriller De stille vogel van Peter Mohlin & Peter Nyström lezen. In een klein Zweeds dörp wodt een bonke van een meenske vunnen in een voegelnust. In datzelde dörp is indertied de Brodin-twieling op een geheimzinnige meniere uut de speultuun verdwenen. Is de bonke lichtkaans van ien van beide jongen? De wildste praot gaot al gauw as een strovuurtien over de streek. John Adderley, die rechercheur is bi’j de pelisie in Karlstad, krigt et dossier op zien buro, wiels hi’j toegeliekertied op zien nichien van negen jaor passen moet. Ontdekt John eindelik wat as d’r eertieds mit de beide jongen gebeurd is?