De schuld

Vandemorgen het Anke hier de boel schonemaekt en vandemiddag bin ik op ‘e fiets naor Wolvege west veur fysiosport. Dat voldot me weer hiel goed. De oprit ligt hier trouwens al vol ekkels. Die kommen van ’t jaor betied naor beneden. Dat zal wel deur de dreugte kommen.

Ik hebbe De schuld van Hjort Rosenfeldt (et schrieversduo Michael Hjort en Hans Rosenfeldt) lezen. Et achtste en laeste diel van de Bergman-kronieken. Sebastian Bergman is een soms onuutstaonbere, egoïstische pelisiepsycholoog die ok nog seksverslaafd is. Mar hi’j kan ok hiel aorig wezen. Ik was vanof et eerste boek een groot fan van de man. Hi’j verleur indertied zien vrouw en dochtertien bi’j de tsunami in Thailaand. Laeter ontdekt hi’j dat hi’j nog een dochter het: Vanja Lither. Die warkt ok bi’j de pelisie. In dit laeste diel wodt even buten Västerås et lichem van een vrouw vunnen. Et onderzuuk wiest uut dat de moord mit Sebastian Bergman te maeken het. Et is een schitterend laeste diel. Is dat dochtertien van him indertied tiedens die vreselike vloedgolf trouwens wel echt verdronken? Of leeft ze misschien toch nog? Ik zal et slot hier niet uut de doeken doen, want verschillende meensken willen dit boek nog van me lienen. Et slot is liekewel schokkend, ok al kuj’ d’r alle kaanten mit op. Aenlik zol d’r nog een negende diel kommen moeten, mar dat komt d’r jammer genoeg niet. Ik hebbe nao al die jaoren en acht prachtige thrillers ofscheid neumen van Sebastian Bergman.