De schriever van de Stellingwarven

In Goes bin ‘k al begonnen mit et rippeteren van verhaelen veur twie optredens en daor gao ik vandaege en morgen veerder mit. Ik mag ankem weke woensdagmiddag verhaelen vertellen veur vri’jwilligers van et ziekenhuus in Et Vene. Op 23 april mag ik in Franeker vertellen veur de leden van Anbo/PCOB.

Tot mien grote verbaozing en verrassing is d’r een lietien over me schreven deur Henk Bijl. Dat is een Stellingwarver in de vremde die in Leverkusen woont. Hi’j mailde et me toe, mar ik kon gien geluud te heuren kriegen. Jarmo het op ofstaand de komputer overneumen en et op mien buroblad zet. Butendat het hi’j onder dit dagboekstokkien wat malle tekens zet. Zodoende zollen jim et ok heuren kunnen. Mar as dat klopt en lokt waog ik nog te betwiefelen. We zullen et zien en heuren. Henk het een klein betien hulpe van AI had. Daank Henk, et is prachtig en een wonder. Poes komt ok in et lietien veur en die vint dat ok slimme mooi. Ik daenke dat dit een tophit wodden zal en binnenkot op radio en tillevisie te heuren en te zien wezen zal. Ik wil stomme graeg mit de zanger in de kunde kommen. Et moet een mooie jonge kerel wezen. Ik hebbe begrepen dat hi’j gedoente mit Jan Smit en de Toppers het. Hopelik kun jim dit moois now beluusteren…