De samaritaan

Veurdawwe eregister naor Lauwersoge gongen, wa’k al in Wolvege bi’j Marian west veur fysio-massage. Vandemorgen he’k, ok in Wolvege, veur de eerste keer naor fysiosport west. Freek het me daor alles rustig en hiel plezierig uutlegd en onder zien begeleiding he’k fietst, lopen, roeid… Et is een hiel goed ding da’k daor now hennegao, daor bin ‘k me goed van bewust. Ik moet aanst wel drie keer in de weke naor fysio en dat veur lange tied. Ien keer massge en twie keer sport. In ieder geval op maendag en vri’jdag, dat is de bedoeling. Mar we beginnen eerst rustigan. Dit komt d’r dus allemaole nog bi’j en mien agenda zit altied al aorig vol. Ik doe best nog een protte. Et is dudelik dat ik now echt niet meer veur alles en iederiene klaorstaon kan.

Ik hebbe de spannende roman De samaritaan van Cilla & Rolf Börjlind lezen. As  pelisievrouw Olivia Rönning tezuke raekt, gaon kollega Lisa Hedqvist en Tom Stilton naor heur op zuke. Et spoor leidet naor een oflegen vekaansiehuus, dat in de braand staot as ze daor kommen. In de smeulende troep wodt even laeter et verkoolde lichem van een vrouw vunnen. Is dat van Olivia of toch niet? Een mooie Zweedse thriller die in de coronatied speult.