Johan Veenstra
Stellingwarver schriever en verteller
Plaetst op 23 jannewaori 2025.
Nao de beide Waddenthrillers De Hollander en De duiker van Mathijs Deen he’k now et dadde diel in de serie, De redder, lezen. Ik kocht et laestdaegs op een literaire aovend mit de schriever in de biebeltheek van Oosterwoolde. Dit dadde diel is ok weer hiel mooi. De Volkskraante schreef dat de Waddenthrillers van Mathijs Deen et Nederlaanse antwoord binnen op al die mooie Skandinavische thrillers. De redder gaot over een vermiste kaptein op et Wad. Nederlaanse vekaansiegangers vienen an de kust van Northumberland de bonkeboel in een reddingsvest van iene die verdronken is. Et reddingsvest is ofkomstig van de sleepboot Pollux die ienentwintig jaor eerder noordelik van Rottumerplaete zonken is. Redders van Amelaand en Borkum konnen de bemanning redden, behalven de kaptein. De recherche gaot de boel onderzuken. Et is wonderlik dat de vrouw en de dochter van de kaptein niet mitwarken willen. De redders van eertieds hebben gien liekese verhaelen. Rechercheur Liewe Cupido lat et onderzuuk over an kollega Xander Rimbach. Hi’j is zels doende mit de dood van zien eigen vader, die verdronk doe Liewe zestien jaor was. Hi’j wil onderzuken hoe dat indertied gaon is. Mar as Xander op Norderney vergiftigd wodt, raekt hi’j d’r toch bi’j betrokken.