De Pleats

Et is now halverwege de middag en ik gao aanst vot. Ik stappe in de auto en gao naor Burgum. Daor gao ‘k eerst op vesite bi’j Janny. Ik zal d’r ongetwiefeld een peer koppies thee kriegen en we zullen genoeglik even bi’jpraoten. Daornao gao ‘k naor De Pleats, daor he’k een ofspraoke mit kammeraod Douwe. We gaon daor tegere waarm eten en zullen ok grif genoeglik bi’jpraoten. En dan ma’k vanaovend in diezelde Pleats vertellen uut eigen wark. Ik hebbe gien bericht had dat et niet deurgaot omdat d’r te weinig belangstelling is, dat et gaot ongetwiefeld deur. Iederiene mag d’r henne. Et begint om kwat over achte. Ik hope dat et een mooie aovend wodt en dat de mikrefoon et disse keer wel goed dot. Ik hebbe eerder vandemiddag nog verhaelen rippeteerd. En toch he’k vlak veur et begin van een optreden geregeld et gevuul da’k alle tekst kwiet bin. Mar a’k dan beginne bliekt alles wel goed te gaon. Ik hope mar dat dat vanaovend ok et geval is.