De Ovend

Ik zal verhaelen schrieven gaon veur et Stellingwarver tiedschrift De Ovend. Verhaelen naor anleiding van foto’s in mien archief. Een schoffien leden he’k Iene dag naor Peries schreven. Dat is goedkeurd, dat mit de kastdaegen he’k Jaegers, viskers en streupers en Een slange in Tétouan maekt. En vandaege Mien leven mit Layla. Dat klinkt enerverend en dat is et ok. Vanof et aprilnommer kommen de verhaelen d’r in. Ik hebbe mit opzet now alvast wat maekt, dan he’k wat liggen. Ik bin nog wel es niet al te fit en dan drift et niet. Zo wark ik mit et schrieven van kollums ok. Nao et schrieven kwammen Harry en Jan an de deure mit een blikkien mit zelsmaekte rollegies. Heerlik, et past bi’j de tied van et jaor. Want ja, dat is al haost weer veurbi’j. En doe vernam ik dat de Friese schriefster Baukje Wytsma gister wegraekt is. Och, nee toch… Zi’j ok al… Ze was lieke oold as ik bin.

En dan nog even over gistermiddag in De Schierstienze in Veenwoolden. De zuster van meester Van der Valle mailde me vandaege nog: Ik wit seker, dat ús Roel it moai fine soe, dat ik noch ris mei in âld-learling fan him praat hie! Dat daenk ik ok! Hieronder een foto. Nao ofloop van oons optreden wodden Grytsje Kingma en ik bedaankt deur Jaap van der Boon van De Schierstienze.