De Ovend

Et eerste nommer van et Stellingwarver tiedschrift De Ovend verscheen in september 1972. Sund die tied laot ik alle jaorgangen van De Ovend netties inbienen. Zoks is beslist niet goedkoop, mar d’r is mar ien Stellingwarver tiedschrift op ‘e hiele wereld en dat heurt netties beweerd te wodden. Vroeger kwammen de jaorgangen in een grune baand, laeter in een rooie baand. Ik gadderde meerstal vier losse jaorgangen bi’j mekaander en dan gong ik d’r mit naor een biender. Lange en lange jaoren het de Noordwest Groep op et industrieterrein van Stienwiek dat veur me daon. Mar ja, doe ‘k in 2020 weer vier jaorgangen bi’j mekeer hadde, kwam corona oons over ’t mad. En dan blift et sloeren… Dat moet vanzels niet. Ik hadde now negen jaorgangen liggen die nog inbunnen wodden mossen, 2017 t/m 2025, dat ik bin gister mit et hiele spul naor Stienwiek gaon. Mar… daor deden ze dat niet meer. Ikke weer naor huus en op internet kieken en bellen. Ik kon nargens een adres meer vienen totdat ik op een man stuitte op et bedrieveterrein De Hemrik in Liwwadden. Die wol et wel doen. Daor he’k de boel vandemiddag dus ofleverd. Et komt now in een zwatte baand. Ik bin bliede dat et toch nog regeld wodden kon. Over vier jaor zien we wel weer, a’k d’r dan nog bin…

As jim een abonnement op De Ovend nemen, steunen jim et Stellingwarfs en de Stellingwarver Schrieversronte. De Ovend komt veur mar 25 euro zes keer in et jaor bi’j jim over de heerd. Ik bin van doel om van ’t jaor en ankem jaor nog deur te gaon mit et schrieven van verhaelen/artikels veur De Ovend. Ik hebbe krek twie verhaelen opstuurd naor de redaktie.