De Ovend

Et is nog altied roetkoold mar wel mooi zunnig, dat ik hebbe vandemiddag nao et eten mar weer een niet al te lange kuier maekt. Daornao he’k et Stellingwarver tiedschrift De Ovend lezen. Dat kwam vandemorgen mit de post. Et eerste nommer van de 53^ste jaorgang. Ik schrieve ok dit jaor elke keer weer een verhael veur De Ovend. Wie de Stellingwarver Schrieversronte en et Stellingwarfs steunen wil dot d’r goed an en neem een abonnement. Veur mar 25 euro in et jaor komt De Ovend dan zes keer in et jaor bi’j je over de heerd.

A’k dichtbundels kope en lezen hebbe, laot ik die nog maonden naost mien stoel liggen. Dan kan ‘k d’r zo now en dan nog es in ommeblaederen. En dan gaon ze uuteindelik de boekekaaste in. Dat gebeurt now mit twie Friestaelige bundels: te pearde/te peerde van Eeltsje Hettinga, daor naost de Friese gedichten ok een vertaeling in et Nederlaans staot en Wij yn ‘e draaimûne van Janneke Spoelstra. Die het hiele mooie gedichten schreven over heur heit!