De Ovend

Ik hebbe vandaege et interview da’k gister vertaeld hebbe nog es bekeken en doe naor Magda Dullemond stuurd. Die is akkoord gaon mit de vertaeling en doe he’k et naor de Stellingwarver Schrieversronte stuurd. Et komt in de eerste Ovend van ankem jaor te staon. Ik hebbe ok et verhael Een dief en een held opstuurd veur De Ovend. Dat gaot over twie manluden uut mien femilie. De dief was Wijbe Gerrits Oosterhof (1691 of 1692-1770). De held was Gerrit Hagevoort (1847-1907). Hi’j was trouwd mit Antje Johannes Oosterhof (1843-1917). Zi’j wodde Annemuj nuumd in de femilie en was een ooldtante van mien moeder. De Ovend is et ienige tiedschrift in et Stellingwarfs. Et komt zes keer in et jaor over de heerd en kost mar 20 euro in et jaor. Overweeg es om een abonnement te nemen!

Hier nog een foto van een prachtige, bluuiende lidkaktus. Disse knaop is zo groot dat hi’j in et trappegat hangt. Aanders past hi’j nargens meer.