De Ofsluutdiek over

Vandaege biwwe d’r op uut west en de Ofsluutdiek overbroesd naor Medemblik. Daor hewwe et Oorlogsmuseum bekeken. Oorlog is niet mooi, et is verschrikkelik, mar et museum is wel mooi en was et bekieken meer as weerd. We hebben d’r eerst wat drinken had mit wat lekkers d’r bi’j en doe hewwe de boel bekeken. Speciaole andacht is daor veur de ienheden die alderhaande veurraoden vervoerden in vrachtauto’s en ie konnen zien hoe tiedelike broggen bouwd wodden. D’r was een protte andacht veur de Slag om Arnhem. Opperaosie Market Garden mislokte. Allieerde soldaoten mossen zien dat ze de Waal weer overkwammen naor de veilige kaant. We zaggen een naomaekte boot daor as ze inzatten wiels ze bescheuten wodden deur de Duutsers. Van de 26 boten kwam de helte mar an de overkaant. Mar ok in die boten weren een protte soldaoten doodscheuten. Et was een bloedbad. In een film zaggen we et en wodde d’r over verteld. Et ontroerde me in hoge maote. Al die jonge kerels die nooit trouwen zollen, nooit kiender kriegen zollen, nooit weer thuuskommen zollen. Ze sturven veur oonze vri’jhied. Daor kuwwe niet daankber genoeg veur wezen en blieven. De Amerikanen bevri’jdden oons indertied mit. Amerike en Europa zollen veur lange jaoren iene wezen. De vri’je, demekraotische, westerse wereld. En dat liekt now verleden tied mit die vreselike Trump. We bin in een uterst geveerlike tied terechtekommen. Ik bin d’r bi’j lange nao niet gerust op dat dit goed beteren zal. We hebben vanaovend heerlik eten in resteraant De Fûke in Echten. Ik hadde superlekkere scholfilet. Hieronder een peer foto’s die ‘k vandaege maekt hebbe.