De nomade

Vandemorgen he’k op ‘e fiets naor mien voetebehemmelster Linda in Noordwoolde west. Dat voldot goed, dat ik zal d’r over zeuven weken weer henne. An et begin van de middag wa’k op ‘e fiets in Wolvege veur fysio bi’j Marian. Ik zal now eerst even elke weke fysiosport doen en ok fysio bi’j Marian om de zere spieren wat extra an te pakken.

Ik hebbe et boek De nomade van de Zweedse thrillerauteurs Pascal Engman en Johannes Selaker lezen. Ze hebben een serie van tot now an toe drie boeken schreven over pelisieman Tomas Wolf en journaliste Vera Berg. De nomade is et dadde diel. Ik moet de eerste beide boeken, In memoriam en Zondeval now vanzels ok nog lezen. Ik zal morgen drekt naor de biebeltheek. De nomade is een prachtig boek. Et verhael speult in 1996. Een bekende neonazi ontsnapt uut een gevangenistraansport. Pelisieman Tomas Wolf wodt d’r op ofstuurd, votdaolik nao de begraffenis van zien ooldere breur Kristian. Wie het d’r hulpen mit de ontsnapping? Vera Berg zicht de ontsnapping as een kaans om weer beter wark te kriegen bi’j Aftonbladet, de kraante daor ze veur warkt. As ze de ontsnapte neonazi dood in een huus in de bos vint, is et dudelik dat d’r wat hiel arg misgaon is.