De nacht reist alleen

Ik kocht een peer weken leden een fluttien proemen op oonze dorpsmark en daor he’k zes potten sjem van maekt. Vervolgens kree’k vergees van Anke een fluttien proemen van een man uut Steggerde. Die zien proemeboom moet stut wodden omdat de takken aanders knappen. Zovule proemen zitten d’r an. Ik hebbe d’r zeuven potten sjem van maekt. Gisteraovend kwam Anke mit een wat kleinder fluttien proemen. Die hadde ze plokt van een boom an een weg in Ni’jlaemer. Dat ik hebbe vandemorgen drie potten van de echte en ienige Ni’jlaemster Proemesjem maekt.

Ik hebbe et twiede boek van de Jacob Weber-reeks van de Noorse thrillerschriever Orjan Karlsson lezen. Die het krek nog in Oosterwoolde west te signeren in de boekwinkel daor. Et kan ok wezen dat hi’j daor nog komt. Een peer weken leden las ik Iselin was bijna thuis en now De nacht reist alleen. As Tuva Mjelde mit twie kammeraodskes een iesbad nemt in et zeewaeter van Kjerringoy komt iene van de kammeraodskes onder waeter vaaste te zitten. El lokt Tuva om heur los te kriegen. Mar dan komt d’r nog wat boven waeter: et liek van een man. Veur inspekteur Jacob Weber en zien kollega Noora Yun Sande is d’r wark an de winkel. Een prachtig en spannend boek. De Jacob Weber-reeks is slim de muuite weerd. Et volgende diel da’k lezen zal is Stil als de sneeuw.