De levenden en de doden

Ik kreeg zes mooie reakties op mien kollum Schoelen die gister in de Liwwadder Kraante ston. De kollum van vandaege is me uut et hatte grepen, mailde een man uut Berkoop en een vrouw uut Wolvege mailde Uw tekst raakt mij zeer. Vandemiddag het d’r een monteur bi’j de ni’je cv-ketel west. Anke ontdekte vleden weke doe ik mit vekaansie was, dat dat ding een klein betien lekte. Hopelik is et ongemak now verhulpen.

Ik hebbe de roman De levenden en de doden in Winsford van Håkan Nesser lezen. Ik mos d’r even inkommen mar doe kon ‘k et kwaolik daeleleggen. Wat een prachtig boek. Op een aovend arriveert de geheimzinnige Maria in et mooie Engelse plakkien Winsford. Ze huurt veur een half jaor een huus op een heuvel in de heide. D’r hangt vaeke mist over de heide. Mit heur hond Castor maekt ze lange kuiertochten. En ze wodt verliefd op Mark en hi’j op heur. Mar wie is Maria aenlik? Hiet ze wel echt zo? En waor is heur man? Vanof et begin wus ik as lezer wat veur verschrikkeliks Maria daon hadde en toch leefde ik mit heur mit. Hoopte ik dat et goed oflopen zol veur heur. Mar dat kon vanzels niet… Et recht moet zien loop hebben.