De Lemmer

Et was gisteraovend een dubbel genoegen en kiek naor de film The Proposol uut 2009 mit Sandra Bullock en Ryan Reynolds. Ik bin een grote fan van Bullock en disse film, die ‘k al wel es eerder zien hadde, is een uterst vermaekelike romantische komedie. Extra mooi was et dat Betty White d’r in mitspeulde. Zi’j is op ooldejaorsdag wegraekt en alleman kende heur vanzels uut de prachtige serie The golden girls. In die serie speulde ze de uut Noorwegen ofkomstige Rose Nylund-Lindstrom. Ze was een betien een deusien dat nogal es stomme dingen uuthaelde. Ze hadde et vaeke over genurkenflurken, een soort Noors toetien. Betty White zol de kommende maendag honderd jaor wodden wezen. Alleman gaot verdikkeme ok mar dood…

Vandemiddag he’k eerst naor de winkel van et Kruudvat in Wolvege west. Omda’k jaorig west was, kree’k daor een flut extra punten op mien klaantekaorte. Bi’j de Welkoop kon ‘k vleden weke ok al een kedo ophaelen en van Rinsma op ‘e Gediek kree’k een kedobon toestuurd. Ze konnen wel wies mit me wezen! Nao et Kruudvat bin ‘k binnendeur naor De Lemmer reden. Ooldelaemer, Echtenerbrogge, Oosterzee… Een mooie route. Ik bin op ‘e Lemmer op vesite west bi’j Harry en Dicky. Die wonen daor in een mooi appattement mit een al lieke mooi uutzicht. Ik was d’r wel in een jaor niet west, dat et wodde ok meer as tied. We hebben genoeglik bi’jpraot. Weeromme bin ‘k weer binnendeur gaon. Et was gelokkig niet al te diezig. Ik bin d’r ok wel es in een dichte mist wegkommen, doe was et zuver wat aangstig rieden op die kleine weggies binnendeur. Mar now ha’k genoeg zicht. Ik ree tachtig op die kleine weggies, mar d’r jachten me drie auto’s aachter mekeer in raozende vaort veurbi’j. De idioten! As d’r toch es minder gekken op ‘e wereld wezen zollen…