De langste dag

Vandaege hewwe de langste dag al weer te pakken. Van now of an gaon we de verkeerde kaant weer op. Bah! En hoe oolder a’k wor, des te meer a’k et gevuul kriege da’k op zokke ogenblikken mit lege hanen stao. Mar ik hebbe vandaege een mooie fietstocht van 56 kilemeter maekt. Ik bin bi’j de Lende langes naor de Driewegsluus reden en doe over de Scheenesluus naor et resteraantien bi’j de Ooldelaemster Brogge. Aanders neem ik daor altied een brotien hamburger, mar ze hadden de boel nog niet klaor. En et was krek twaelf ure west… Dat ik hebbe doe mar een bakkien drinken mit een hiempe appelgebak had. En dat veur mar 5 euro…Wat trouwens een prachtige bloemen onderweg. De waeterspirea bluuit en de hempies bluuien ok. En dan die mooie pollen mit witte bloemen van et duzendblad en de rose bloemen van de kesies. Prachtig! Nao et appelgebak bin ‘k deur de Braandemeer fietst en doe bi’j de iesbaene van Ni’jlaemer langes naor et fietspad bi’j de Kuunder langes naor Mildam. Daor an de Kuunder is now een  buurtien mit huzen daor Oekrainers wonen. Deur de Mildamster Poolder en bi’j de Scheene langes bin ‘k weer naor huus gaon. Thuus he’k de boel versierd mit vlaggies en ik hebbe de dorpsvlagge uutdaon. Et is van vandaege of 8 daegen feest in Ni’jhooltpae. Hieronder nog een foto. Dit is et zaandstraantien bi’j et Wiede van de Lende. Hier lag Mara Silvius indertied mit et heufd in et waeter. Ze was verdronken en wodde vunnen deur rechercheur Rik Smit van de Heirweg uut Wolvege. Mara en Rik hadden krek een nogal wilde naacht beleefd in et Van der Valkhotel. En elke keer a’k daor langesfietse daenk ik: daor lag ze!