De laeste loties

Vandemorgen he’k een kollum schreven mit de titel Oranjezoemer en vandemiddag he’k weer naor de Eupen Stal in Berkoop west. Ik bin daor mit de laeste loties doende en die bin hielemaole niet zo zwaor. Et was vandemiddag slimme drok in Berkoop. Ik hebbe weer prima verkocht, gien rekord, mar wel op twieje nao de beste dagopbrengst. En de kollum Instituut zorgt nog altied veur een protte praot. Een man wol zien a’k echt een dikke boek hebbe en een vrouw zee dat et mit de reenfels in de hals best wel mitvul en ik hadde inderdaod een mooie bos krullen. Een aandere vrouw zee dat ik d’r now et beste an doen zol en doe naachs wel een naachtpakkien an, now et vule minder waarm is. Ik moet niet beklumen. Goeie raod is nooit weg. Alie en Wopke kwammen hielemaole uut Kootstertille om bi’j me te kieken en vreugen hoe as et now mit me gaot en ze nammen heerlike kedogies mit. Et is mooi dat de meensken zo mitleven. Nog weer een aandere vrouw heurde mien stemme en koppelde die drekt an de man die vroeger stiekelstokkies op ‘e Friese radio vertelde. Daor luusterden ze altied naor. Ze wol graeg da’k mien haandtekening op et routeboekien van Eupen Stal zette.

Hieronder een foto die ‘k vandemiddag maekt hebbe. Op dit mooie huus kiek ik elke dag uut in Berkoop. Tegenover Villa Vredewoud waor de femilie Willinge Prins indertied woonde staot Klein Vredewoud. Krek as et grote huus is et bouwd in 1899 en et was eertieds et huus van de tuunman.