De laeste dag van et jaor

We hebben de laeste dag van et jaor al weer te pakken. Et gaot vusen te vlogge. Dat is vanzels onzin, de tied gaot krek zo vlogge as vroeger. Mar et vuult wel dat et vlogger gaot omdat de tied die me nog toemeten is al mar kleinder wodt. Hoevaeke zo’k nog een jaorwisseling mitmaeken? Et is zo staorigan vanzels wel te overzien. Vanaovend za’k zoas gebrukelik naor Haarm en Jacob om daor et oolde jaor uut te zitten. Ik komme vannaacht weer thuus en poes zal zolange op et huus passen. Ik gao op ‘e morgen van ooldejaorsdag altied naor de bakker van Berkoop om wat lekkers mit naor Et Vene nemen te kunnen. Dat zo’k vandemorgen dus ok doen, mar doe ontdekte ‘k dat et zundag is. Ik bin hielemaole mit de daegen in ’t wilde. Et was mar goed dat de supermarken wel los weren, aanders hadden we vanaovend niet meer as een peer maelkoekies had. Ik hebbe vandaege nog een kollum schreven en wat lezen. Harry, Frans en Jan kwammen ok nog even langes. Die brochten me, dat is ok al gebrukelik, een blikkien mit eigenmaekte rollegies. Ik hebbe d’r drekt twie opeten. Ze bin heerlik!

Ik weens alle dagboeklezers en -lezeressen vanuut Ni’jhooltpae een goeie jaorwisseling toe en veul heil en zegen in et ni’je jaor!