De Kring van Bercoop

Gisteraovend he’k in MFA MeJander naor de ledevergeerdering west van De Kring van Bercoop. Nao de vergeerdering was de naojaorsbi’jienkomst van de Kring. Et wodde een prachtige aovend die verzorgd wodde deur de taelkundige, taeladviseur, schriever en theatermaeker Wim Daniëls. Hi’j is bekend van radio en tillevisie en zien boek Het dorp was een bestseller. De belangstelling veur zien optreden in Berkoop was groot. De burgemeester van Oost-Stellingwarf was d’r en raodsleden uut Oost- en West-Stellingwarf. Daniëls kon prachtig en mit een protte humor vertellen over zien Braobaanse dörp, zien femilie, dörpsfeguren, de karke en de tael van zien dörp. Hi’j gruuide ientaelig op in et Braobaans zoas ik ientaelig opgruuide in et Stellingwarfs. Eerst op ‘e legere schoele kwammen we in kontakt mit et Nederlaans. Zo was dat vroeger… Neffens Daniëls bin over vuuftig jaor alle streektaelen verdwenen. Dat leek iederiene wel mit him iens te wezen. Wil een tael bestaon blieven dan moe’n meensken in ieder geval trots wezen op heur tael. Daniëls nuumde de mobiliteit van de meensken as de uuteindelike ondergang van de streektaelen. Zo gauw as d’r op ‘e schoelepleinen gien streektael meer praot wodt, is et vanzels een verleuren spullegien. Mar zolange as die tael nog bestaot kun we d’r nog een protte mooie dingen mit doen. Krek zoas ik mien boeken bi’j mien optredens te koop hebbe, hadde Wim Daniëls zien boeken ok bi’j him. Daor was een grote belangstelling veur. Ik hebbe ok een boek van him kocht: Op vakantie! Een geschiedenis van onze vrije tijd. Ik zal et zeker mit genoegen lezen. Et was een mooie aovend in Berkoop!