De krater

Vandemorgen he’k de 50 exemplaoren van Pake en beppe Pluus naor de Schrieversronte in Berkoop brocht. Ik hadde ze vleden weke ophaeld bi’j Bornmeer op ‘e Gediek. Dat now kan de boel mar verkocht wodden. Vandemiddag he’k op ‘e fiets de diek uut west. Ik mos naor de dokter in Wolvege en onderwegens naor huus toe he’k argens overleg had over een bi’jdrege van de JVS veur een netuurprojekt.

Ik hebbe de Friese edisie van De krater mit genoegen lezen. Dat was et boekewekegeschink van dit jaor. Et is schreven deur Gerwin van der Werf en in et Fries vertaeld deur Jetske Bilker. Et verhael gaot over Eden die mit heur twie breurs onderwegens is naor een meteorietkrater, argens in Duutslaand. Ze wil perberen om heur jongste breur Benjamin te redden, want die zit ommeraek in de onderwal. De ooldste breur, Johnny, het een riebewies. Benjamin wet alles over steerns en meteorieten. En hopelik wet Johnny de weg naor de krater te vienen. En Eden? Die zit d’r altied tussenin.