De kluizenaar

Eerst moe’k een blunder ongedaon maeken. In mien dagboekstokkien van 9 november he’k et over et karkien van Oostrum, mar dat moet et karkien van Oostum wezen. Ik wodde daorop attendeerd deur een dagboeklezer. Ik bin een doezerd. Vandemorgen he’k boeken ophaeld bi’j de Stellingwarver Schrieversronte in Berkoop, want ik zal binnenkot op drie marken staon mit boeken. Et zol aorig wezen a’k jim daor dan tegenkomme en een boek an jim verkopen kan. Ik bin op zaoterdag 25 november op ‘e Wintermark in Mildam. Ik stao daor mit boeken op boerekamping De Geele Bosch. Op vri’jdagmiddag 8 december bin ik in et karkien van Blesdieke en op zaoterdag 16 december in de karke van Scharpenzeel. Dit komt allegeer ok op ‘e webstee van de Schrieversronte te staon. Vandemiddag he’k de jaorlikse kontrole op huudkanker had en et zicht d’r op et ogenblik wel goed en rustig uut.

Ik hebbe de superspannende thriller De kluizenaar van Jorn Lier Horst lezen. Dat is ien van de bekendste Noorse schrievers. Vlakbi’j et huus van pelisieman William Wistings wodt Viggo Hansens dood in zien huus vunnen. Hi’j zat al vier maonden dood in de stoel veur de tillevisie. Line, de dochter van Wistings, die journalist is, gaot op onderzuuk uut. En dan wodt d’r in een striepe bos weer en dooie vunnen die daor ok al maonden legen het. Wat volgt is een klopjacht op een seriemoordener. En… die moordener het et ok op Line veurzien. Superspannend! Now wi’k vanzels de aandere boeken uut de Wistings-serie ok lezen!