De kleur van de tijd

Vandemorgen he’k Henk en Dinie op vesite had. Dat zol al lange es, mar now is et dan ok echt gebeurd. Dinie warkte tot 1989 op ‘e ofdieling loonbelasting van de belastinginspektie in Et Vene. Doe warkte ik daor ok nog. Ze lest elke dag dit dagboek en het Nedersaksische oolden. Vader kwam van De Kuunder en moeder van Hasselt. Thuus wodde dus Nedersaksisch praot. Et Stellingwarfs klinkt heur dus slimme vertrouwd in de oren. En Henk hadde femilie in Wolvege a’k et zo gauw goed begrepen hebbe. We hebben genoeglik praot en hebben et over een protte oold-kollega’s had. Ik zal ok es bi’j heur in Et Vene kieken. Dat kan ‘k wel es kombineren a’k vandezoemer es op ‘e fiets naor kapster Bertha gao. Een schoffien leden ha’k een boek van heur kregen: De kleur van de tijd dat schreven is deur Gert Knook. Dat is de grootvader van Henk en Dinie heur schoondochter die in Stienwiek woont. Zi’j is dus trouwd mit de ooldste zeune van Henk en Dinie die schoelemeester in Hooltpae west het. In dat boek vertelt de schriever over zien leven en et leven van zien oolden en femilie. Een verhael dat in et interbellum, de tied tussen eerste en twiede wereldoorlog, begint en d’r spraoke was van grote aarmoede. Et begint mit Neeltje en Jaap en et speult in de Meer. Dat is de Haarlemmermeer. Neeltje wodt deur heur vader naor et deftige huus Casa Nova brocht, daor komt ze as dienstmaegien bi’j de dokter in huus. De femilie van Jaap kwam van Braobaant naor de Meer. Daor zollen ze et grif beter kriegen, mar dat vaalt of. Jaap kan ommeraek goed leren. Meester Klaassen komt bi’j heur an huus en zegt tegen Jaap zien vader dat zien zeune deurleren moet. Mar dat gaot niet deur. Zoks wodt in de femilie niet daon. Jaap komt bi’j een boer an et wark. En dan kommen Neeltje en Jaap mekeer tegen… Ik hebbe et boek in iene goeze uutlezen. Et is hiel herkenber. Zovule verschilden et leven in de Stellingwarven en et leven in de Meer in die tied niet. Et was overal ongeveer etzelde. Et was een slim krappe tied.