De Karstenhoeve

Een daggien vot is gien verplichting mar ontspanning… Vandaor da’k dat wel doe. We bin vandaege naor Runerwoold west. Daor hewwe Museumboerderi’je De Karstenhoeve bekeken. Prachtig! We hebben daor eerst op ‘e dele wat drinken had mit een plakke perekeek d’r bi’j. De boerderi’je stamt uut et jaor 1680 en de femilie Karsten het daor een peer honderd jaor woond en boerkt. Et was daore de rieke streek van Drenthe. De boeren brochten heur negosie naor de mark in Meppel en daor wodde et kocht deur koopluden uut Amsterdam. Zo kwam de botter uut Runerwoold in Amsterdam! De femilie Karsten was smoorriek en dat is te zien. Wat een prachtige betegeling, wat een prachtige meubels en serviesgoed. We kregen mit een stokmennig aandere bezukers twie verschillende rondleiders mit. Iene veur et veurhuus en iene veur et aachterhuus. En die beide manluden vertelden prachtige verhaelen over de oolde gebruken. As een maegien veur de eerste keer ongesteld wodde, was ze van maegien vrouw wodden. De manluden wodden dan et huus uutstuurd en opoe pakte de schere. Die knipte et maegien et haor of en bi’j zodat ze een ooriezer op hebben kon. En vanof die tied zat et maegien bi’j de volwassen vrouwluden. Aarm kiend, daenk ik now. Ik hebbe d’r een pottien Runerwoolder proemesjem kocht. Van Runerwoold biwwe naor Dwingel gaon en daor hewwe wat eten in de serre van hotel Wesseling. Ik hadde een twaelfuurtien: een koppien courgettesop, een plakkien bolle mit een kroket en een tosti. Ik hebbe nog nooit zoe’n lekkere tosti had. Heerlik! Hieronder een foto die ‘k vandemiddag maekt hebbe van De Karstenhoeve.