De ijskring

Vandaege he’k een verhael plus foto’s naor de redaktie van et Stellingwarver tiedschrift De Ovend stuurd. Dat verhael ha’k een schoffien leden al schreven. Ik hebbe ok een kollum klaormaekt die naor de kraante moet. Deur mien vekaansie za’k die now de kommende maendagmorgen al versturen. Butendat he’k een kollum schreven over Enjoy Laandhotel Lunia in Berkoop. Dat is een hiele mond vol!

Ik leze een protte Skandinavische thrillers. Et meerst Zweeds, mar ok wel Noors, Deens en Ieslaans. Now he’k een Finse thriller lezen: De ijskring van Max Seeck. Een mooi en spannend boek. Nao een fesien raeken twie jonge Finse influencers te zuke. Een schoffien laeter komt d’r een vremde foto op heur Instagran-account te staon. Een foto van een oolde vuurtoren op een rotsachtig eilaand midden in de zee. Mit een gedicht d’r bi’j dat heur dood beschrift. Jessica Niemi gaot op onderzuuk uut, mar et spoor liekt dood te lopen. Dan ontdekt ze dat de twie bloggers een geheim dielden. De daoder speult een levensgeveerlik spel en liekt niet te stoppen.