De hydrograaf

Ik hebbe de roman De hydrograaf van Allard Schröder lezen. Een hiel biezunder boek da’k van Douwe te lien kreeg. Schröder kreeg veur disse roman de AKO Literetuurpries van et jaor 2002. Et boek vertelt de geschiedenis van Graaf Franz von Karsch-Kurwitz. Op 13 april van et jaor 1913 gaot hi’j an boord van de viermaster Posen veur de reize van Hamburg naor Valparaiso. Et is een jaor veur et uutbreken van de Eerste Wereldoorlog en Franz zal as hydrograaf onderwegens onderzuuk doen. Zien leven verlopt op dat mement niet zoas hi’j et graeg hebben zol en dan komt hi’j an boord in de kunde mit de Nederlaanse Asta Maris en hi’j raekt slimme verkikkerd op heur.

De eerste kast- en ni’jjaorskaorten roegelen hier et huus al in. Ik hebbe d’r nog gien tied veur had en gao daor mit an de gang. Et ni’je boek vret tied. Morgen bin ‘k de hiele dag en aovend op pad, dan wodt et dus niks. Misschien da’k d’r zundag of maendag wel an toekomme. Ik moet d’r meer as honderd schrieven, dat daor bin ‘k jaors wel haost een dag mit doende.